ՆԵՐՍԵՍ ՇՆՈՐՀԱԼԻ. Երգարան

Ներսես Շնորհալի շարականներ

Քրիստոս ի մէջ
Քրիստոս ի մէջ մեր յայտնեցաւ,
 Որ Էնն Աստուած աստ բազմեցաւ:
Խաղաղութեան ձայն հնչեցաւ,
 Սուրբ ողջունիս հրաման տուաւ:
Եկեղեցիս մի անձն եղաւ,
Համբոյրս յօդ լրման տուաւ:
Թշնամութիւնն հեռացաւ,
Սէրն ընդհանուրս սփռեցաւ:
Արդ պաշտօնեայք բարձեալ զձայն,
Տուք օրհնութիւն ի մի բերան,
Միասնական Աստուածութեանն
Որում սրովբէքն են սրբաբան.

Սիովնի որդիք
Սիովնի որդիք, զարթիք,
Հարսին լուսոյ տուք աւետիք.
Եթէ փեսայն քո յարուցեալ պըսակե
Յաղթեաց մահու իշխանութեամբ.
Գայ պըսակէ ըզքեզ փառօք,

Ել ընդառաջ պըճնեալ զարդուք.
Երգեա երգ նոր յարուցելոյն՝
Նընջեցելոց կենաց պըտղոյն:

Արեգակն արդարութեան
Արեգակն արդարութեան
Ի Հայաստան ծագեալ պայծառացուցեր
Սուրբ զեկեղեցի խընայեա ի մեզ,
Պարգեւատու բարեաց.

Եւ ողորմեա քո արարածոց:
Պանծալի սուրբ զաւակօք հովիւքըն զըւարթունք,
Հրով հոգւոյն շիջուցին ըզբոցն
Ըզկրակապաշտ պարսիցն.
Մաղթանօք սոցա խընայեա ի մեզ
Պարգեւատու բարեաց.
Եւ ողորմեա քո արարածոց:
Պարթեւական տեսանողին
Յառաջագոյն ազդեցութեամբ,
Զհաւատոյ սըրբոյն Գրիգորի պըսակազարդ տեսեալ.

Մաղթանօք սոցա խընայեա ի մեզ,
Պարգեւատու բարեաց.
Եվ ողորմեա քո արարածոց:

Քեզ՝ Քրիստոսի կաթուղիկէ
Եկեղեցւոյ շնորհողի զյաղթական, զպատուական, զաստուածընկալ սուրբ նշանս, մատուցանեմք զօրհներգութիւն միշտ ի բարձունս:

Սա կամաւ Քո, Քրիստո՛ս, եւ թեւօք ամենազօր Սուրբ Հոգւոյն եւ դասուք հրեշտակաց թռուցեալ եկաւորի ի լեառն Վարագայ՝ բնակիլ ի նմա:

Եկա՛յք, ժողովո՛ւրդք, երկրպագեսցուք աստուածային սուրբ նշանիս. համբարձէ՛ք միաբան զձեռս ձեր ի սրբութիւն, եւ զբնակեալն ի սմա միշտ փառաւորեսցուք:

Յիշեսցուք ի գիշերի
Յիշեսցուք ի գիշերի զանուն Քո, Տէ՛ր:
Բղխեսցեն սիրտք մեր զբան բարի, եւ լեզուք մեր պատմեսցեն զգործս երկնաւոր Թագաւորիդ:
Ի մէջ գիշերի յարուցեալ՝ խոստովանեսցուք զՔեզ, Տէ՛ր:
Զաղօթս մեր տացուք Քեզ, Տէ՛ր, ի գաւիթս Քո ի մէջ նոր Երուսաղեմի:
Ի գիշերի համբարձցուք զձեռս մեր սրբութեամբ առ Քեզ, Տէ՛ր:
Ի ձայն գոհութեան, ամենա՛յն հոգիք, օրհնեցէ՛ք զՏէր:

Ուղեւորաց ճանապարհի  

Ուղեւորաց ճանապարհի  
Լերուք ի նոյն ընթացակից,  
Եւ նաւելոց, որք ի ծովու,  
Զղեկաւարք եւ նաւաստիք։ 
Այլ եւ տարերց բարեխառնիւք  
Տուք զպտղոց առատութիւն.  
Ի ցասմանէ զպահպանութիւն…  
Լերուք պաշտպան մեզ եւ հոգւոյ: 
Տուք խռովութեանց խաղաղութիւն.  
Եւ երկիւղից անհոգութիւն.  
Ի տրտմութեանց զուրախութիւն.  
Եւ ի վշտաց սփոփութիւն։ 
Զտարաժամ մահուց բարձումն.  
Զանապատ արեանցն դադարումն.  
Եվ յամենայն կեանս ըստ մարմնոյ.  
Լերուք պաշտպան մեզ և հոգւոյ: 

Զարթիք փառք իմ, զարթիք.

Գրաբար
Զարթիք փառք իմ, զարթիք.
և ես զարթեաց առաւօտուց. ալելուիա:
Զարթիք ընդ զուարթունս,
Մանկունք վերինն Սիոնի. ալելուիա:
Զարթիք որդիք լուսոյ
Ի յօրհնութիւն Հօրն լուսոյ. ալելուիա:
Զարթիք փրկեալք արեամբ
Եվ տուք ըզփառս փրկողին. ալելուիա:
Զարթիք նոր ժողովուրդք
Նոր երգս առեալ նորոգողին. ալելուիա:
Զարթիք հարսունք հոգւով
Սպասեալք գալոյ սուրբ փեսային. ալելուիա:

Աշխարհաբար

Արթուն կացեք ինձ փառավորողներ, զարթնեք. և ես զորավոր կլինեմ առավոտից։
Արթուն կացեք հրեշտակների հետ, Վերին Սիոնի մանուկներ։
Արթուն եղեք, լույսի որդիք՝ օրհնելու Լույսի Հորը։
Արթուն կացեք, արյամբ փրկվածներ, և փառք տվեք Փրկողին։
Զարթնեք, նոր ժողովուրդներ՝ նոր երգ ձոնելով Նորոգողին։
Զարթուն եղեք հոգով, Սուրբ Փեսայի գալուն սպասող հարսներ։

Աշխարհաբարի փոխադրեց Սուսան Մարկոսյանը

Նոր ծաղիկ

Գրաբար

Նոր ծաղիկ պայծառ ցուցաւ, այսօր ի նոր գերեզմանէն: Երեւեալ լոյս յարութեան, աւետիս, ի խաւարի ստուերաց մահու, աւետիս: Յարեաւ Քրիստոս, աւետիս:

Երփնազարդ հոգւոցն տունկք կանաչացան կենդանութեամբ: Երեւեալ լոյս յարութեան, աւետիս, ի խաւարի ստուերաց մահու, աւետիս: Յարեաւ Քրիստոս, աւետիս:

Րենական լուսոյ սաղարթք, ի հոգեւոր գարնան փթթեալք: Երեւեալ լոյս յարութեան, աւետիս, ի խաւարի ստուերաց մահու, աւետիս:

Յարեաւ Քրիստոս, աւետիս:

Աշխարհաբար

Նոր ծաղիկ պայծառ երևաց նոր գերեզմանից։ 
Հարություն առավ Քրիստոս, ավետիս։ 
Երփնազարդ հոգիների տունկերը կենդանությամբ կանաչեցին։
Երևաց հարության լույսը, ավետիս, 
մահվան խավար ստվերներից, ավետիս։ 
Հարություն առավ Քրիստոս, ավետիս։
Հոգևոր գարնանը փթթել են Էական լույսի սաղարթները։ 
Երևաց հարության լույսը, ավետիս,
 մահվան խավար ստվերներից, ավետիս։

Հարություն առավ Քրիստոս, ավետիս։
Փոխադրությունը՝ Սուսան Մարկոսյանի

Աշխարհ ամենայն

Աշխարհ ամենայն առ իս նայեցեալ, ախտակից լերուք:
Բանամ ըզշրթունս, բարբառիմ լեզվովս, բողոքեմ զանձնէս:
Տէր, ողորմեա, Տէր, ողորմեա, Տէր, ողորմեա:
Գող եղե մեղաց, գտող կորըստեան, գուբ ինձ փորեցի:
Դաւեցի զանձն իմ, դաւաճանեցի, դարան գործեցի:
Տէր, ողորմեա, Տէր, ողորմեա, Տէր, ողորմեա:
Երբեմն էի լոյս, եւ այժմ եմ խաւար, եւ ըստվեր մահու:
Զիարդ պատմեցից. զթիւ մեղաց իմոց, զի բազում են յոյժ:
Տէր, ողորմեա, Տէր, ողորմեա, Տէր, ողորմեա:

Հորդորակ

Անեղանելիդ Աստված, Հայր ամենակալ,
Ընկալ զաղաչանըս մեր քոց պաշտոնեից:
Ի Հորե ծագումն անճառ, արեգակն արդար,
Ծագեա ի հանձինըս մեր, զլոյդս ողորմութեան:
Ի Հորե բըղխեալ Հոգի, աղբյուր բարութեան,
Լուսով քով լըցո ըզմեզ հայսմ առավոտուս:
Էրկինք եւ երկիր, եկայք ողբացեք եղկելի զանձն իմ:
Ընտրեցի ըզչարն. ընկալայ կամաւ ըզհոյլըս մեղաց:
Տէր, ողորմեա, Տէր, ողորմեա, Տէր, ողորմեա:
Զարթիք նոր ժողովուրդք
Նոր երգս առեալ նորոգողին. ալելուիա:
Զարթիք հարսունք հոգւով սպասեալք
Գալոյ սուրբ փեսային. ալելուիա:

Հայրապետ սուրբ եւ անբիծ
Հայրապետ սուրբ եւ անբիծ եւ ընտրեալ յորովա
սքանչելագործ վկայ եւ պարծանք ազգի մարդկան.

առ Քրիստոս բարեխօսեա վասն մեր քո տօնողացս:
Հովիւ հոգեւոր բանաւոր հօտի,
լուսաւորիչ տիեզերաց սիւն լուսոյ կանգնեալ
ի մեջ եկեղեցւոյ. Առ Քրիստոս բարեխօսեա
վասն մեր քո տօնողացս:
Հաստատութիւն հաւատոյ պսակ ի գլուխ եկեղեցւոյ.
պայծառ քարոզ տիեզերաց եւ պարծանք ազգի մարդկան.
առ Քրիստոս բարեխօսեա վասն մեր քո տօնողաց:

Հրաշափառ Աստված

Հրաշափառ Աստված և միշտ բարեխնամող.
Որ յառաջ գիտութեամբ ըզփրկութիւն
Հայաստանեայց ըսկզբնաւորեալ ի պարթեւական
մեղապարտ ազգէն լուսավորիչ մեզ շնորհեցեր.
Վասն որոյ բարեխօսութեամբ սորա Փրկիչ կեցո
ըզմեզ այժմ եւ ի քո յահաւոր գալստեանն:
Թագաւոր երկնաւոր զեկեղեցի քո անշարժ
Պահեա, եւ զերկրպագուս անւանդ քում պահեա
Ի խաղաղութեան:

Գովեա, Երուսաղէմ

Գովեա Երուսաղէմ զՏէր:
Յարեաւ Քրիստոս ի մեռելոց. ալէլուիա:
Եկայք ժողովուրդք. երգեցէք Տեառն` ալէլուիա:
Փառք Հօր եւ Որդւոյ եւ Հոգւոյն Սրբոյ
այժմ եւ միշտ եւ յաւիտեանս յաւիտենից ամէն:
Յարուցելոյն ի մեռելոց ալէլուիա,
որ զաշխարհս լուսաւորեաց, ալէլուիա:

Նայեաց սիրով

Գրաբար

Նայեաց սիրով, Հայրդ գթած,
Ի քո ստեղծեալ գործս ձեռաց.
Եւ զբանակս հրեշտակաց
Տուր պահապան մեզ տկարացս,
Փրկեա զանձինս ի փորձանաց,
Ի խաւարի շրջող դիւաց.
Զի ի տուընջեան և գիշերի
Տացուք քեզ փառս անլռելի:

Էին անեղ, անսկզբան`
Ծնունդ անճառ Որդի և Բան.
Որ արարեր զտիւ գործոյ
Եւ զգիշեր ի հանգիստ քնոյ.
Տուր ի ննջել` աչաց մարմնոյ,
Արթուն լինել մեզ ըստ հոգւոյ.
Զի ի տուընջեան և գիշերի
Տացուք քեզ փառս անլռելի:

Րաբուն հոգւոց բանաւորաց,
Աղբիւր լուսոյ, բաշխող շնորհաց.
Ի փակիլ դրանց բնութեանց մարմնոց,
Լոյս տուր աչաց սրտից մերոց.
Ի գիշերաց առ քեզ կանխել,
Ընդ հրեղինացն օրհնաբանել.
Զի ի տուընջեան և գիշերի
Տացուք քեզ փառս անլռելի:

Աշխարհաբար

Ո՛վ գթառատ Հայր,
սիրով նայի՛ր Քո ձեռքերի ստեղծածներին
և մեզ՝ տկարներիս, պահապան տո՛ւր
բանակները հրեշտակների։
Փրկի՛ր մեր անձերը փորձանքներից,
խավարի մեջ շրջող դևերից,
որպեսզի գիշեր ու ցերեկ
անդադար փառք տանք Քեզ։
Անստեղծ և անսկիզբ Աստծո
անճառելի Ծնունդ, Որդի՛ և Բա՛ն,
որ ցերեկը աշխատելու,
իսկ գիշերը հանգստյան քնի համար ստեղծեցիր,
մեր մարմնի աչքերը թող ննջեն,
բայց հոգով մնանք արթուն,
որպեսզի գիշեր ու ցերեկ
անդադար փառք տանք Քեզ։
Բանական հոգիների վարդապետ,
լույսի աղբյուր, շնորհների բաշխող, Սո՛ւրբ Հոգի,
մեր մարմնեղեն դռները փակվելիս՝
լո՛յս տուր մեր սրտերի աչքերին, որ
գիշերները կանուխ արթնանանք
և հրեշտակների հետ Քեզ օրհնաբանենք,

որպեսզի գիշեր ու ցերեկ

անդադար փառք տանք Քեզ։

.Ճանապարհ բարի Քրիստոս եւ ճշմարտութիւն.

Գրաբար:
Ճանապարհ եւ ճշմարտութիւն եւ կեանք,
Քրիստո’ս. առաջնորդեա’ հոգւոց մերոց յերկրէ ելանել յերկինս:
Դուռն կենաց մտից, Յիսո’ւս, մո’յծ եւ զմեզ առ Հայր քո եւ Հոգի՝ երգել միշտ զփառս:

Աշխարհաբար
Ճանապարհ և Ճշմարտություն և Կյանք, Քրիստո’ս, առաջնորդի’ր մեզ` բարձրանալու երկրից դեպի երկինք:
Կյանքի մուտքի դուռ, Հիսո’ւս, մեզ էլ ներս տար Քո Հոր և Հոգու մոտ` միշտ փառաբանություններ երգելու:

Նորահրաշ պսակավոր

Նորահըրաշ պըսակաւոր և զօրագլուխ առաքինեաց,
Վառեցար զինու հոգւոյն արիաբար ընդդէմ մահու,
Վարդան, քաշ նահատակ, որ վանեցեր ըզթըշնամին,
Վարդագոյն արեամբըդ քով պըսակեցեր զեկեղեցի։

Երկնաւոր թագաւորին զինու յաղթեալ ի պատերազմին,
Խոհական իմաստութեամբ խոհեմացեալ անճառապէս.
Խորէն խորհրդական և ծանուցեալ անուն բարի,
Խաչելոյն վըկայ եղեալ, հեղմամբ արեան պըսակեցաւ։

Րենական լուսով լըցեալ արիացեալըն քաշն Արտակ,
Թաթաւեալ ի կարմրութիւն բոսորային բըղխեալ աղբէրն.
Ըզփըրկականն ըմպեալ զբաժակ և մըկըրտեալ արեամբն իւրով,
Դասակցեալ ընդ անմարմնոցըն երրորդութեանն երգել ըզփառս։

Սըրբափայլ ըզգեստուք պըճնեալ ի յերկնաւոր հանդիսադրէն.
Երրորդութեամբըն զօրացեալ վանեալ զամուրս բանսարկուին,
Հըմայեակ հօր ընծայեալ որդւոյ գոլով չարչարակից,
Հոգովն յաղթեալ պատերազմին և չարասէր թագաւորին։

Էական բարւոյն դիտմամբ ընդդէմ մեղացըն վառեցաւ,
Տարագընաց ելիւք յերկինս պարակցեալ ընդ անմարմնոցըն,
Տաճա՜տ զարմանալի տաճար եղեալ երրորդութեանն.
Տէրունեան սուրբ խորհըրդոյն տուն և տեղի արժանացեալ։

Ստացեալ ըզհաւատոյ վահան յուսոյն զրահիւք ծածկեալ,
Ըզփըրկականըն սաղաւարտ ի գլուխ եդեալ նըշան խաչին,
Վահան վեհ երևեալ, նոր մանկութեամբ նահատակեալ,
Խաչելոյն վըկայ եղեալ պըսակեցաւ արեամբն իւրով։

Ի հոտ անուշ ողջակիզեալ մատուցանէր զինքըն նուէր,
Բանաւոր պատարագաւ, ընծայելով հօր ի յերկինս՝
Արսէնըն ցանկալի արդարութեամբըն ճոխացեալ,
Իմաստութեամբ պայծառացեալ յեօթնարփեան շնորհաց հոգւոյն։

Երկոքումբք հարազատօք ընտրելագոյն նահատակօք,
Յառաջեալ յամենեցունց գլուխ և աւարտ մարտիրոսաց.
Նախաշաւիղ գոլով բարեաց՝ յառաջադէմըն Գարեգին,
Ընկալեալ ըզբըրաբիոնն յաղթանակի նահատակացն։

Րամկական խումբ հազարաց և երեսնից թիւ ընդ վեցից,
Որք ընդ նոսին նահատակեալք արիաբար պատերազմաւ.
Եւ հեղին զարիւնս իւրեանց ի նորոգումն եկեղեցւոյ,
Ընդ նոսին պըսակելով ի յերկնաւոր հանդիսադրէն։

Գոհութեամբ փառատրութիւն երրորդութեանըդ նըւագեմք,
Բազմութեամբ պըսակելոցս զմեօք մածեալ առաքինեացս,
Եկեղեցիք Հայաստանեայց պայծառապէս զարդարեցան,
Ունելով միշտ բարեխօս ըզճըգնութիւն մարտի սոցա։

Առաւօտ լուսոյ

Առաւօտ լուսոյ,
Արեգակն արդար,
Առ իս լոյս ծագեա:

Բըղխումն ի Հօրէ,
Բըղխեա ի հոգւոյս,
Բան քեզ ի հաճոյս:

Գանձդ ողորմութեան,
Գանձիդ ծածկելոյ
Գըտող զիս արա:

Դուռն ողորմութեան,
Դաւանողիս բաց,
Դասեցո վերնոցն:

Երրեակ միութիւն,
Եղելոց խնամող,
Եւ ինձ ողորմեա:

Զարթիր, Տէր, յօգնել,
Զարթո ըզթմրեալս,
Զուարթնոց նըմանիլ:

Էդ Հայր անսկիզբն,
Էակից Որդի,
Է միշտ սուրբ Հոգի:

Ընկալ զիս, գըթած,
Ընկալ, ողորմած,
Ընկալ, մարդասէր:

Թագաւոր փառաց,
Թողութեանց տուող,
Թող ինձ զյանցանս:

Ժողովող բարեաց,
Ժողովեա եւ զիս
Ժողովս անդրանկաց:

Ի քէն, Տէր, հայցեմ,
Ի մարդասիրէդ,
Ինձ բժշկութիւն:

Լեր կեանք մեռելոյս,
Լոյս խաւարելոյս,
Լուծանող ցաւոյս:

Խորհրդոց գիտող,
Խաւարիս շնորհեա
Խորհուրդ լուսաւոր:

Ծնունդ Հօր ծոցոյ,
Ծածկելոյս ստուերաւ
Ծագեա զլոյս փառաց:

Կենարար փրկիչ,
Կեցո զմեռեալս,
Կանգնեա զգլորեալս:

Հաստեա հաւատով,
Հաստատեա յուսով,
Հիմնեցո սիրով:

Ձայնիւս աղաչեմ,
Ձեռօքս պաղատիմ,
Ձիր բարեաց շնորհեա:

Ղամպարամբ լուսոյ,
Ղեկավար ճարտար,
Ղօղեալս ամրացո:

Ճառագայթ փառաց,
Ճանապարհ ինձ ցոյց,
Ճեպել ի յերկինս:

Միածինդ Հօր,
Մոյծ զիս յառագաստ
Մաքուր հարսանեացդ:

Յորժամ գաս փառօք
Յահագին աւուրն,
Յիշեա զիս, Քրիստոս:

Նորոգող հնութեանց,
Նորոգեա եւ զիս,
Նորոգ զարդարեա:

Շնորհատու բարեաց,
Շնորհեա զքաւութիւն,
Շնորհեա զթողութիւն:

Ուրախացո, Տէր,
Ոգւոյս փրկութեամբ,
Ոյր վասն եմ ի սուգ:

Չար մշակողին,
Չար սերմանց նորին
Չորացո զպըտուղն:

Պարգեւիչ բարեաց,
Պարգեւեա իմոց
Պարտեացս թողութիւն:

Ջուր շնորհեա աչացս,
Ջերմ հեղուլ զարտօսր,
Ջնջել զյանցանս:

Ռետինդ քաղցու,
Ռամ հոգւոյս արբո,
Ռահ ցոյց ինձ լուսոյ:

Սէր անուն Յիսուս,
Սիրով քով ճըմլեա,
Սիրտ իմ քարեղէն:

Վասըն գըթութեանդ
Վասն ողորմութեանդ,
Վերստին կեցո:

Տենչալւոյդ տեսլեամբ
Տուր ինձ յագենալ,
Տէր Յիսուս Քրիստոս:

Րաբունդ երկնաւոր,
Րոտեա զաշակերտս
Րամից երկնայնոց:

Ցօղ արեան քո, Տէր,
Ցօղեա ի հոգիս,
Ցընծասցէ անձն իմ:

Իիւծեալըս մեղօք,
Իիւծեալ աղաչեմ,
Իիւսել ինձ բարիս:

Փրկիչ բոլորից,
Փութա զիս փրկել
Փորձութեանց մեղաց:

Քաւիչ յանցանաց,
Քաւեա զօրհնաբանս,
Քեզ երգել զփառս: